2024年第二季亞洲交易廳最新動態
Text on screen: 黃晶晶，信貨產品策略師
黃晶晶：大家好，我係信貸產品策略師黃晶晶。今日好高興邀請到投資組合經理張冠邦，探討一吓經濟同市場嘅最新發展，以及當中嘅啟示。
Text on screen: 張冠邦，亞洲投資組合經理
張冠邦 (Stephen Chang)：晶晶，多謝你嘅邀請。今日有好多值得討論嘅議題。
晶晶：係呀，Stephen。亞洲信貸市場今年表現唔錯，尤其係高孳息債券。其中一項主要嘅亞洲高孳息債券基準喺1月至4月頭升值接近7%。有乜嘢驅使佢哋有咁嘅表現呢？
Stephen：撇除房地產業，高孳息債券嘅基本因素前景同投資信心已經明顯改善。亞洲整體市場嘅信貸息差已經收窄接近50基點，高孳息債券更加收窄200基點，超越大部份環球信貸基準。
息差收窄意味住亞洲信貸同政府債券呢啲極安全投資之間嘅回報差距縮細。咁樣通常反映投資者對市場更有信心，願意為較低嘅超額回報承擔更大風險。息差收窄係亞洲信貸市場錄得超額回報嘅主因之一。
Text on screen: 亞洲市場信貸息差收窄有何啓示？
- 信貸息差 ＝ 低風險債券（例如政府債券）所支付的利息與高風險債券支付的利息之間的差距
- 反映投資者對市場更有信心
晶晶：不過亦都導致估值收窄。
Stephen：無錯。雖然呢啲債券比以前貴咗，但仲有另外一個影響因素。而家嘅新債發行量比之前少，可能反映出刺激息差大幅擴闊嘅技術壓力減弱咗。
另一個推動亞洲信貸基準表現領先嘅因素，係亞洲信貸嘅存續期比環球信貸基準短，即係代表亞洲信貸受利率變化嘅影響較細，同時可以受惠於經濟擴張。
除此之外，亞洲市場亦有一個值得注意嘅現象：當利率上升嘅時候，息差往往會收窄。呢個趨勢主要由區內收益型買家嘅需求所帶動，有助維持市場穩定，並加強表現。
Text on screen: 推動亞洲信貸基準表現領先因素
- 息差收窄
- 對利率變化不太敏感
- 收益型買家需求帶動
晶晶：品浩對亞洲信貸市場有乜嘢展望？
Stephen：整體嚟講，品浩預期後市將進一步企穩，因為技術因素強勁，而且新債市場嘅供應仍然偏低。市場嘅承險意欲似乎恢復緊。
我哋會繼續集中維持相對強韌嘅投資組合，進一步喺廣泛亞洲市場分散投資；與此同時，雖然存在地緣政治風險同選舉嘅不明朗因素，但由於市場仲未反映太多波幅，我哋對表現較弱嘅行業維持審慎立場，繼續靈活投資。
晶晶：照咁睇，我哋對亞洲信貸市場係採取均衡嘅投資策略。係呢，品浩最近分享咗對環球經濟同市場嘅前景展望。不如你同大家分享吓當中有咩重點？
Stephen：無錯，品浩最近發表咗未來6至12個月嘅展望，題為「市場趨向各異，投資多元分散」。我哋認為，隨住主要經濟體嘅發展分歧更加明顯，環球投資環境喺嚟緊幾個月嘅回報差距將會擴大。
雖然唔少大型已發展市場經濟體嘅增長放緩，但係美國嘅動力意外保持強勁，多個利好因素會繼續發揮影響。美國似乎仍然有望實現經濟軟著陸，而家嘅市場定價反映出衰退可能性偏低。
但我哋認為，由於環球供求狀況承受前所未有嘅衝擊，加上各國政府同央行採取唔同對策，導致經濟衰退同通脹重燃嘅風險繼續增加。
Text on screen: 品浩對經濟及市場的最新看法要點：
- 主要經濟體發展分歧趨明顯，環球投資環境回報各異
- 不少大型已發展經濟體增長放緩，但美國動力保持強勁
- 經濟衰退及通脹重燃風險仍高
晶晶：咁我哋對新興市場嘅機遇同挑戰有咩睇法？
Stephen：我哋認為，喺利好嘅環球經濟同貨幣政策環境之下，新興市場債券可以提供吸引而穩定嘅回報來源，同埋分散投資優勢。
不過，唔少新興市場國家之間將會存在差異。我哋觀察到，部份新興市場經濟體嘅央行率先行動，而且當地利率相對已發展市場享有實質孳息優勢，故此投資機遇更加吸引。我哋認為投資於個別新興市場貨幣，係目前從新興市獲益嘅最佳途徑。
晶晶：多謝Stephen嘅觀點，亦好多謝大家收睇今日嘅節目。我哋會繼續帶嚟最新資訊，同大家一齊駕馭複雜市況。再見！